Hangoolnews.com
Xuska 26 June: Farmaajo iyo Muuse oo jeediyay hadallo kala fog
June 26, 2020 - Written by Hangool News 1

Iyadoo maanta ay ku beegan tahay 26-ka Juun oo ah maalintii gobollada waqooyi ay xornimada ka qaateen gumeystihii Ingiriiska ayaa waxaa munaasabado lagu qabtay magaalooyinka Hargeysa iyo Muqdisho ka hadlay Madaxweynaha Soomaaliya Maxamed Cabdullaahi Farmaajo iyo Madaxweynaha Jamhuuriyadda iskeed ugu dhawaaqday madaxbanaannida ee Somaliland, Muuse Biixi.

Munaasabadahan oo lagu xusayay xuska sannad-guurada 60-aad ee ka soo wareegtay maalintii xorriyadda gobollada waqooyi ayaa madaxweynaha Soomaaliya waxaa uu sheegay in guulo ay ka gaareen wadahadallada dowladiisa ay la yeelatay Somaliland.

“Waxaan hadda u soconaa 30 sano cusub, soddonka soo socda waxaan raadineynaa midnimo, waan bilawnay in aan raadino midnimo, oo aan ka raadineyno walaalaheen Somaliland, muddo ayaa ka shaqeneynay, Allena waa nagu guuleeyay, waxaan rajeynyenaa in wadahadalkaas uu nqodo mid miro dhal ah, maxaa yeelay waan isu baahanahay, inta ay naga maqan yihiinna ma dhaqaaqi karno, iyagana ma dhaqaaqi karaan”, ayuu yiri madaxweyne Farmaajo oo xalay ka hadlayay munaasabad lagu qabtay madaxtooyada Villa Soomaaliya.

Madaxweyne Farmaajo ayaa sheegay in iskaashiga dalalka geeska Afrika ee Soomaaliya, Eritrea iyo Itoobiya ay Soomaaliya bilawday, fikirkaas asalkiisana ay lahayd.

Xafladdii 26 June ee magaalada Hargeysa
Qoraalka sawirka,Xafladdii 26 June ee magaalada Hargeysa

“Fikirkaas markiisii hore waxay ahayd in lagu qabto Sudan, balse ma aysan suurtagelin oo annaga ayay markii dambe inoo suurtagashay”, ayuu raaciyay hadalkiisa.

Tartanka iyo iskaashiga gobolka geeska Afrika ayuu sheegay in Soomaaliya iyo Somaliland ay ku gaari karaan midnimo iyo horumar.

Dhanka kale madaxweynaha Somaliland, Muuse Biixi ayaa sheegay in haddii Somaliland ay la midoobeyso Soomaaliya ay tahay in shanta Soomaliyeed ay sidoo kale qeyb ka noqdaan midnimadaas.

“Wadahadalada waxaynu ku heshiinay shirkii London, wadahadlkana wuxuu ku socdaa laba dowladood oo siman, wuxuuna ku dhamaanayaa laba dowladood oo siman”, ayuu yiri Madaxweyne Muuse oo ka hadlayay xaflad lagu qabtay Hargeysa.

Muuse ayaa sidoo kale sheegay in shirkii Jabuuti lagu heshiiyay in aanan laga hor-imaanin waxyaabaha aan ka ahayn siyaasadda.

Muuse iyo Maxamed
Qoraalka sawirka,Madaxtooyada Somaliland

“Kooxda kubadda cagta ee Soomaliland haddii ay nqooto in ay tagaan Koonfur, waa in ay tagaan iyagoo wata baasaboorka Somaliland, iyago wata calanka Somaliland iyo magaca Somaliland, koox muusig haddii ay tagayaan waa in ay ku tagaan basaboorka Somaliland, calanka Somaliland iyo magaca Somaliland, dal ku gal ayayna ku tegayaan”, ayuu sii raaciyay hadalkiisa.

COMMENTS
Latest News