Hangoolnews.com
Maleeshiyaadkii Maamul Goboleedka Puntland Oo Kala Yaacay, Sababta Ay Uga Baxeen Furimihii Ay Joogeen Iyo Madaxweynaha Maamulkaasi Loo Doortay Oo Markii Ugu Horraysay Si Layaab Leh Uga Hadlay Somaliland
January 10, 2019 - Written by Hangool News 1

Garoowe, January 10, 2019- (Hangool-News)- Maleeshiyaadkii Maamul Goboleedka Puntland oo in muddo ahba xaaladdooda laga dayrinayay kadib Mushahar la’aan iyo xaalad dhaqaale xumo iyo waliba saluug ay ka qabeen hannaanka hogaamineed ee Madaxweynihii hore ee Maamulkaasi Cabdiweli Maxamed Cali Gaas ayaa shalay saldhigyo kala duwan oo ay ku sugnaayeen isaga baxay, gaar ahaan kuwii fadhiyay jiidda Tukaraq ee dhinacan Somaliland.

Maleeshiyaadka Maamul Goboleedka Puntland oo qaab-dhismeedkoodu marka horeba u diyaarsanaa qaab beelaysan oo u kala joogay qaabka beelaha ay ka soo jeedaan ayaa waxa xaaladda oo muddooyinkii dambe ku xumayd uga sii daray sida ay wararku sheegayaan markii uu dorraad guul darraystay oo shan cod lagaga badiyey Mid ka mid ah Musharaxiinta tartamaysay oo ay si gaar ah u taageersanaayeen kaasi oo ninka dhallinyarada ah ee Janaraalka ahaa oo lagu magacabo Asad Cismaan Cabdilaahi Diyaano kaasi oo kaalinta labaad ka galay tartankii doorashada ee lagu doortay Siciid Cabdilaahi Maxamed Deni.

Wararkii ugu dambeeyey ee naga soo gaadhaya Magaalada Garoowe ee Caasimadda Maamul Goboleedka Garoowe ayaa sheegaya in shalay galinkii hore Guutooyin fara badan oo ku kala sugnaa goobo kala duwani isaga baxeen xarumihii ay daganaayeen kuwaasi oo magaalooyinka iyo tuulooyiinka u kala yaacay iyaga oo gaadiidkooda wata taasi oo keentay in ay kulan degdeg ah isugu yimaaddaan madaxtooyada Puntland Madaxweynaha la doortay, Madaxweynaha xilka sii haya ee laga guulaystay iyo saraakiisha ciidamada kulankaasi oo ay kaga arrinsadeen xaaladdan culus ee Maamulkooda soo food saartay.

Cabdiweli Maxamed Cali Gaas oo shalay galab warbaahinta la hadlay ayaa sheegay in shacabka iyo ciidamada Puntland ay la shaqeeyaan Madaxweynaha cusub ee la doortay Siciid Cabdilaahi Deni halka ninkii tartanka adag la galay Madaxweynaha la doortay ee Asad Cismaan Cabdilaahi oo qoraal dheer ku baahiyay barta uu Facebook ku leeyahay uu ciidamada ugu baaqay in ay xarumahooda ku noqdaan oo la shaqeeyaan Madaxweynaha la doortay.

“Waxaan si xushmadi kujirto uga codsanayaa Ciidanka Difaaca Puntland ee kasoo baxay Furimaha Cadowga ay ku hor fadhiyeen Inay ku laabtaan Xarumahoodii hore wixii tabasho ama Sheegasho ah Waa lagala hadlayaa lagana qancin doonaa. Waxaan rajaynayaa inaan Kulan deg deg ah La qaato Ciidanka Soo baneeyey Furimaha dagaalada Isla markaasna tabashadooda dhagaysano, Sidoo kale Dowladda Puntland Iyo madaxweynaha Cusub Waa muhiim Inay dhagaystaan Ciidanka Sheegashadooda” ayuu qoraalkiisa ku yidhi Janaraal Asad Cismaan Cabdilaahi

Dhinaca kale Madaxweynihii dorraad baarlamanka maamulkaasi doorteen ee Siciid Deni oo shalay telefishanka SBC la hadlay, mar wax laga waydiiyay Somaliland iyo waxa uga meel yaalla ayaa sheegay in aanay jirin wax Somaliland la yidhaahdan Soomaaliyana tahay hal dal oo lagu magacaabo jamhuuriyadda Federaalka Soomaaliya. Isaga oo arrintaasi ka hadlayaa waxa uu yidhi: “Somaliland way qaldan tahay. Haku noqoto meeshoodii. Deegaamada ay haysataa maaha kuwo ay iyagu leeyihiin. Waxaan ku dadaali doonnaa in aan soo celino dhulka Puntland ee ay Somaliland qabsatay. Waxaan ku baaqaynaa in ay degdeg isaga baxaan deegaamada ay haystaan” ayuu yidhi Madaxweynaha cusub ee maamulkaasi Garoowe loo doortay dorraad Salaasadii Siciid Cabdillaahi Deni

 

COMMENTS
Latest News