Hangoolnews.com
Xaalada Dad Iyo Duunyo Ee Deegaanada Waqooyiga Burco Oo Meel Halisaa Maraysa + Sawiro
December 26, 2016 - Written by Hangool

Togdheer (Hangoolnews.com)- Dadka iyo duunyada ku dhaqan deegaanada waqooyiga gobolka Togdheer ayaa laga dayrinayaa xaaladooda nololeed, iyada oo ay saamayn ballaadhan ku yeelatay xaalada abaareed ee dalka ka jirta, deegaanadaasi oo ay ka mid yihiin Samakaab, Gadhka-ardala, Bali-warfaa, Buurcarro, Gunbur-caro iyo Karin.

Deegaanadaaasi waxa ka jira duruufo adag oo ay wehel u yihiin lana wadaagaan deegaanada kale ee ay abaartu ku dhufatay , dhulkaasi oo ah meel leexsan oo uu gaadiidka iyo gurmadka labaduba ku yar yihiin, isla markaana aan helin wax gargaar ah.

Jaamac Xaaji Rooble oo ah oday degan deegaanka Samakaab oo warbaahinta la hadlay ayaa ka warbixiyay xaalada nololeed ee deegaankaasi, waxaanu yidhi “Wey jiiftaa, wey aroori weyday, daaqbay weyday, xoolahaasi waa ay yuururaan, Geella iyo Adhiguna waa ay isu eeg yihiin, marnaba may iman wasaarada caafimaadku, tan abaartana waxaa dadka kaga daran, markii xoolahan ay dul-joogaan ay wax ka dayeen ee ay dubteen, xanuunbay ka qaadeen, dadka eeriyadan oo dhamina waa ay xanuusanayaan, waxay heystaana ma jiraan, markaa waxaanu leenahay caafimaadku waa inuu si deg dega noogu yimaadaa, teeda kale waxaa noogu darani waa biyo.”

Hooyo Caasha Jaamac Kidiye oo ka mida dadka deegaanka Samakaab ayaa si weyn uga deyrisay xaaladooda nololeed, waxaanay tidhi “Hooyo baahi dad iyo baahi duunyaba waanu qabnaa, abaar baanu qabnaa, caydh, gaajo iyo haraad, intaba waanu qabnaa, hanala gacan qabto oo ha naloo soo gurmado ayaanu leenahay”

Aabo Axmed Cali Yuusuf oo ka mida odayaasha deegaanka Gadhka-ardala ayaa sheegay in xoolaha deegaankoodu ay itaal-dari darteed   meel fog ay u aroori kari waayeen, waxaanu yidhi “Adhyaha qaar ayay maanta u toban tahay oo ooman,  caatada halkaasi tuman, ee biyo la’aan meelna u aroori waayay, una kici waayay,  aad iyo aad ayaanu haraadkaas iyo biyo la’aantaasi ay noo taabatey, aduunyada wixii soconayay iyo wixii aan soconeyn toona aad bay u jilicsan yihiin, ee deg deg ha naloogu soo gurmado”

 

Xasan Diiriye Xuseen oo ka mid ah odayaasha deegaanka Bali-warfaa ayaa sheegay in saddex meeloodow laba meelood ay dhinteen xoolihii ay dhaqanayeen, waxaanu yidhi “Xooluhu waa ay baxeen, waxa joogaana naf malaha, aad iyo aad ayay u dhinteen, waxaa maanta noolina saddex meeloodow laba meelood ayaa nool, meesha ay xoolahani joogana baad iyo biya midna ma laha, Illaahay uun baanu ka war sugeynaa”

Gudoomiyaha deegaanka Gunbur-caro oo isaguna warbaahinta la hadley ayaa yidhi “Ilaahay baa wax bixiyee wixii ay umadayada iyo dawladayadu ay noo heli karto ha noo keenaan, baraaguhu waa ay naga madhan yihiin, waxaa ugu horreeya ee maanta dad iyo xoolaba u dhinteen ee is dulyaala waa gaajo iyo haraad, waa deegaan ka leexsan wadooyinka ay baabuurtu maraan, intaas waxaa noo dheer meesha xoolaha cuduro ayaa haya, mana heyno dhakhaatiir noo daaweysa”

Hooyo Cibaado Jaamac Dheer, kana mida deegaanka Bali Caraale ayaa si dareen taabasha leh uga hadashay saameynta ay abaartu ku yeelatay waxaanay tidhi “duunyadii waa ay madhatay, geeli waa uu dhamaaday, adhigii waa uu dhamaaday, maxaad u maleyn dhirtaa muuqata oo neef xoola ahi ka soo dareeri waayay, xooluhuna tarab tarab ayay u dhinteen, wax aanu cunno ILLAAHAY baa balan qaaday, hase ahaate biyo iyo baad wey yar yihiin, biyaha ayaana noogu daran, duunyadiina waanu kala soconey oo wey dhamaatay, Illaahey baanu u baahanahey, laakiin wixii Muslin ah ee jiidhka naxaa ku yaalo waxaanu uga baahanahay gargaar, haday cirka roobka weyday, oo dhulka caws ka weyday, waa si Ilaahay uun”

“wey jiiftaa, wey aroori weyday, daaqbay weyday, xoolahaasi waa ay yuururaan”….. Jaamac Xaaji Rooble

 

“haday cirka roobka weyday, oo dhulka caws ka weyday, waa si Ilaahay uun” Hooyo Cibaado Jaamac

Hangoolnews.com

Hangoolnews@gmail.com

Burco/Office

 

COMMENTS
Latest News